२४ कात्तिक, काठमाडौं । लियोनेल मेसीको ह्याट्रिकप्रेरित बार्सिलोना शनिबार राति भएको खेलमा सेल्टा भिगोलाई ४–१ ले पराजित गर्दै स्पेनिस ला लिगाको शीर्ष स्थानमा उक्लिएको छ ।  घरेलु मैदान क्याम्प नोउमा भएको खेलको २३औं मिनेटमा पाएको पेनाल्टीलाई सदुपयोग गर्दै मेसीले बार्सिलोनालाई अग्रता दिलाएका थिए ।

. भ्रमणकारी टोली सेल्टा भिगो ४२औं मिनेटमा लुकास ओलाजाको गोलबाट बराबरीमा फर्किएको थियो । तर पहिलो हाफको इन्जुरी समयमा मेसीले व्यक्तिगत दोस्रो गोल गर्दै टोलीलाई पुनः अग्रता दिलाए ।

४८औं मिनेटमा मेसीले ह्याट्रिक पूरा गरेका थिए भने निर्धा्रित समयको खेल सकिन ५ मिनेट बाँकी रहँदा सर्जियो रोबर्टोले बार्सिलोनाका लागि चौथो गोल गरे। लिग लिडर बार्सिलोनाले जितसँगै १२ खेलमा २५ अंक जोडेको छ भने दोस्रो स्थानको रियाल मड्रिडको पनि समान खेलबाट समान २५ अंक छ ।